Geðveikur leikfimitími og mjaðmahreyfingar (hvað er nú það!)

Ég er semsagt í 16 vikna námskeiði í Hreyfingu sem er auðvitað ekki frásögum færandi.  Áðan fór ég þó í geðveikan tíma, þvílík snilld.  Eyrún, sem kennir á námskeiðinu, þurfti að leysa annan kennara af sem vegna veikinda og sameinaði því tvo tíma.  Tímann okkar og svo danspartýtíma.... ómg hvað það var gaman.  Geðveikt gólferóbikk með dansívafi í 50 mín - crazy gaman.

Ég var með risa bros allan tíman og gat ekki annað en hlegið annað slagið og þá hló ég að sjálfri mér.  Ég er nú ekki nægilega illgjörn til að hlæja mjög mikið að öðrum.  En vá hvað íslenskar konur eiga erfitt með að hreyfa mjaðmirnar... hehe við erum bara algjörir spítukarlar.  Ég var að reyna að losa um og vera opin fyrir öllum sveiflunum, en nei, ekki að ræða það, þessar blessuðu mjaðmir bara vildu ekki sveiflast til og þá alls ekki í takt við tónlistina.... svo reyndi ég að bæta handahreyfingunum við og ég varð eins og ...... æ nei á ekki einu sinni orð yfir hvað ég sá í speglinum   Gaman samt og virkilega hressandi.

 

Robertson ekki feigur

Þetta er lygilegt, ótrúlegt að lifa svona brotlendingu af.  Eins og hlífðarskjöldur hafi verið yfir manninum - myndin segir allt sem segja þarf!

mbl.is

Lifði af flugslys með ævintýralegum hætti

°66 Norður vs. 66°Norður...

Kjánalegt að sjá vörumerkið 66°Norður rangt skrifað, allavega hef ég aldrei vitað til þess að gráðumerki væri sett fyrir framan töluna áður...... og það er meira að segja rangt skrifað bæði í fyrirsögninni og í fréttinni sjálfri. 

Tarantino farinn að auglýsa vörur 66°Norður, úff, hvernig á það eftir að fara með verðlagið á vörum fyrirtækisins.  Nú þegar eru vörurnar það hátt verðsettar að það er aðeins á færi nokkurra auðjöfra að versla þessi föt.  Fínar vörur en maður hugsar sig nú samt tvisvar um áður en fjárfestingin fer fram.  Á meðan maður hugsar kíkir maður á fatnað Cintamani, sem er líka íslensk hönnun, og þar þarf maður ekki að hugsa sig tvisvar um.  Varan er bæði mjög góð og á betra verði   Hér er hægt að komast á heimasíður fyrirtækjanna www.cintamani.is og www.66north.is.

Tarantino í 66° Norður

Sykurneysla á Íslandi

Fyrir þá sem hafa gaman af tölfræði um sykurneyslu þá er þetta tilvalin lesning.  Allavega nokkuð áhugavert og trúverðugt alveg fram að síðasta liðnum en þar er þetta farin að vera spurning um að tapa sér í fávísri yfirlýsingagleði.  Njótið vel! 

Vissir þú að ...

... sykurneysla á mann á Íslandi er komin upp í eitt kíló á viku?

... með viðbættum sykri í skólajógúrt, skólaskyri, rjómaskyri, ávaxtajógúrt og þykkmjólk fer heildarsykurmagn vörunnar í 10-14%?

... venjuleg mjólk, ab-mjólk, óblandað skyr og súrmjólk innihalda aðeins um 4% mjólkursykur, allan frá náttúrunnar hendi?

... eina morgunkornið sem ekki inniheldur viðbættan sykur eru óblandaðar hafraflögur?  Cheerios er þó aðeins 3% sykur, Corn Flakes 5%, All Bran 18%, Múslí 22%, Frosted Cheerios inniheldur 40% sykur og Coca Puffs 47%.  Þessar vörur eru þó auðugar af ýmsum bætiefnum.

... gosdrykkjaneysla á Íslandi hefur rúmlega þrefaldast á þremur áratugum og er nú komin í meira en 130 lítra á mann?

... þurrefni í gosdrykkjum er meira en 99% sykur?

... algengt magn viðbætts sykurs í kexi er 17-19% og í kökum 21-28%?

... sykri er bætt í nánast allan pakka-, dósa- og glasamat á Íslandi?

... ennþá er ekki skylt að tilgreina viðbættan sykur á umbúðum íslenskra matvæla?

... enginn aðili á Íslandi telur sig hafa það hlutverk að mæla hvort innihaldslýsingar á   íslenskum matvælum séu sannleikanum samkvæmar?

... nýjar rannsóknir í Bandaríkjunum benda til svipaðs boðefnarugls í heila við neyslu sykurs og við neyslu fíkniefna og borð við áfengi og heróín?

Tekið saman af Náttúrulækningafélagi Íslands og Heilsustofnun NLFÍ í Hveragerði.

Spúkí við Rauðavatn

Kvöld eitt í síðustu viku ákvað að renna upp að Rauðavatni og leyfa Töru að skottast aðeins um.  Ég var heldur seinna á ferðinni en venjulega og fattaði ekki fyrr en of seint að ég var sennilega meira en bara aðeins of seint á ferðinni því það var niðamyrkur niðri við vatnið og ekkert tunglsljós.  Ég lagði bílnum og þar sem ég er nú frekar myrkfælin hringdi ég í manninn minn og tilkynnti hvar ég var stödd í heiminum.  Þá hófst göngutúrinn.  Við röltum eitthvað aðeins upp eftir stígunum og eftir svona 15 mínútur gat ég ekki meira, ég bara varð að snúa við.  Ég var búin að ímynda mér alls kyns hluti, sá eitthvað annað en steina og tré.  Það er alveg ótrúlegt hvað maður getur espað hræðsluna upp hjá sjálfum sér.  Tara var líka alltaf að stoppa til að horfa út í myrkrið og líta á mig til skiptis. Til að auðvelda leiðina til bara hringdi ég í vinkonu mína og spjallaði við hana alla leiðina til baka að bílnum.  Þegar komið var að bílnum hélt ég að ég væri hólpin, opnaði bílhurðina til að fá ljós og allt í góðu.  Tara hoppaði dugleg upp í bílinn og þegar ég var að festa hana leit hún skyndilega út um gluggann og byrjaði að gelta..... ég hélt ég yrði ekki eldri enda missti hjartað út eitt slag.  Ég öskraði á grey Töru sem snarþagnaði og ég gat klárað að festa hana.  Hún fór þó aftur að glugganum og byrjaði að gelta aftur.  Þá var mér allri lokið, ég skellti hurðinni aftur og henti mér inn í bílstjórasætið með þeim afleiðingum að ég dúndraði öðrum fætinum í stýrið með tilheyrandi bölvi.  Setti bílinn í gang og ætlaði sko að vera snögg að læsa öllum hurðum en það gekk ekki betur en það að ég opnaði gluggann í staðinn, sem er með auto stillingu svo hann fer alla leið niður..... tókst þó loksins að loka glugganum aftur og læsa hurðunum og bruna af stað.  Ég kom því rétt svo lifandi úr þessum göngutúr....  en eitt er víst, ég mun aldrei aftur fara í göngutúr þarna eftir myrkur!  Mikið rosalega hefur samt draugsi skemmt sér vel yfir þessu öllu saman

Gerviólétta...

Ég fór með Töru mína í árlega heimsókn til dýralæknis til að fá bólusetningu fyrir hana og þess háttar dóterí.  Til að nýta ferðina ákvað ég að lýsa yfir áhyggjum mínum yfir vaxtarlagi elskunnar minnar en hún hefur fitnað talsvert síðastliðið ár og undanfarna daga hefur matarlystin aukist en hreyfiþörfin minnkað.  Vegna umræðunnar um lifrabólgutilfellin sem hafa verið að greinast hélt ég kannski að hún væri eitthvað lasin.  Læknirinn mældi hitann og þreifaði hana og þuklaði og spurði mig allskyns spurninga áður en hún kom með greiningu - já hún er bara gerviólétt  Ég varð svo hissa og sagði bara ó mæ god, í alvöru!  Það er mjólk í spenunum sagði læknirinn og ég bara gapti meira og sagði að það gæti nú ekki verið.  Jú víst, sjáðu, sagði læknirinn og kreisti einn spenann og úr honum kom smá hvítur vökvi.... mjólk... ég er svo aldeilis hissa.  Hafði nú reyndar heyrt af svona ástandi, sem er sökum ruglings í hormónum eftir lóðarí, en að það myndi gerast fyrir tíkina mína hafði aldrei hvarflað að mér.  Þessi greining útskýrir hinsvegar margt í fari hennar.  Nú skil ég til dæmis þessa skyndilegu knúsþörf hennar en hún lætur mig varla í friði þegar ég sit í sófanum, hún vill bara kúra hjá mér og sleikja mig.  Æ þessi litla elska.

Eftirfarandi lýsingu á gervióléttu fann ég á vef Dýralæknastofu Suðurnesja: 

"Svokölluð gerviólétta er ástand sem margar tíkur ganga í gegnum. Þær sýna einkenni þess að vera hvolpafullar, fá aukna matarlyst, verða kviðmeiri, júgrið stækkar og mjólkurframleiðsla fer jafnvel í gang. Sumar virðast undirbúa got, búa sér til hreiður og verða eirðarlausar og taka að sér ýmsa hluti (t.d. bangsa) 5-10 vikum eftir lóðarí. Þetta skýrist að hluta til af því að styrkur meðgönguhormónsins er mjög hár í blóði tíka eftir lóðarí, í sumum tilfellum jafn hár og hjá tíkum sem eru hvolpafullar. Hætt er við því að tík sem verður gerviólétt einu sinni, verði það einnig á næsta lóðaríi."

Ég fór í dótabúð eftir vinnu áðan og keypti nokkra bangsa handa litlu dúllunni minni svo hún hafi nóg að knúsast með.  Ég tek þetta sem vísbendingu um hvað hana langar rosalega að eignast hvolpa svo vonandi fær hún tækifæri til þess síðar

Tími ljóskunnar liðinn

Nú er vika liðin frá því að ég litaði hárið á mér dökkt en ég ákvað að gefa ljóskunni smá frí.  Mig hefur alltaf langað að prófa að vera dökkhærð og svei mér þá, ég kann bara ágætlega við það.  Allavega bregður mér ekki lengur þegar ég lít í spegil en fyrstu dagana fannst mér alltaf eins og ég væri með eitthvað á hausnum eins og húfu eða buff   Annars var ég nú nokkuð smeyk um að þetta væri kannski ekki til hins betra þar sem fólk kom ekki með nein viðbrögð við breytingunni, hélt kannski að fólk vildi ekki ljúga með því að segja, "flott á þér hárið" en finnast það í rauninni ekki og kysi því að þegja....  þetta var engin smá breyting þar sem ég var mjöööög ljóshærð.  Ég hafði á orði við bróður minn að ég væri að prófa þetta og sjá ég fengi meiri virðingu frá öðrum, ná mér í smá "respect" og hann skaut þá að mér..... "já þú meinar svona gervigreind"  hehe...  Sjáum nú til með það!

Ég elska haustið...

Ég held pottþétt að ég sé haust.  Veðrið er oft svo milt og yndislegt á þessum árstíma þó það rigni nú reyndar rosalega í augnablikinu.  Svo er það allur erillinn sem oft fylgir haustinu, skipuleggja skólann og kaupa fullt af rándýrum bókum, skipuleggja starfið í sveitinni og byrja að hlakka til jólanna.  Svo mikið um að vera og það elska ég.  Sumarönnin í skólanum er nýbúin og haustönnin byrjaði í dag svo skólinn er "on fire".  Fór einmitt í dag og keypti 3 skólabækur sem reyndar setja fjárhaginn úr skorðum, en það er dýrt að vera í skóla svo þetta bara fylgir.

Næstu helgi er svo fundur stjórnar og hópstjóra sveitarinnar en þá ætlum við að fara út úr bænum og skipuleggja hauststarf sveitarinnar.  Þessu fylgir heljarinnar skipulagning og dagurinn í gær og dag hefur að miklu leyti farið í allskonar snúninga.  Nú er ég bara að bíða eftir að það berist til mín matur.... veit reyndar ekki hvort ég fái nokkuð að borða sem er kannski bara ágætt, á kannski smá forða sem ég get tekið af.  Annars ætla ég að byrja í leikfimi 4. september í Hreyfingu og reyna að koma mér í eitthvað smá form fyrir jólin, þó ekki kökuform.... hehe... 

Þar til síðar

Coke Zero - zero vinningar!

Hmmm... ég er búin að drekka alveg óheyrilega mikið magn af Coke Zero í sumar en hef ekki fengið einn einasta vinning   Svo þekki einn ágætan mann sem drekkur ekki oft Coke en fær sér það þó annað slagið og þá vel sykrað.  Hann hefur 4 sinnum fengið 0,5 L kókflösku í vinning!!! 

Ein alveg ýkt sár  

Ljúf verslunarmannahelgi í Húsafelli

Ég átti frábæra helgi í Húsafelli en ég var þar ásamt stórum hluta fjölskyldu minnar.  Þemað var án efa mótor-mótor en Júlía bróðurdóttir mín var að kaupa sér krossara, svo eigum við krossara líka og pabbi fjórhjól svo nóg var af dóti til að leika með.  Það var geðveikt stuð að fá að prófa krossarann hennar Júlíu, verst að ég er svo klofstutt að ég náði rétt niður á jörðina með tánum...  Þetta stubbagen + gallað jafnvægisskyn gerði það að verkum að ég var alveg kostuleg á hjólinu   Aksturinn á fjórhjólinu gekk þó öllu betur enda eru þar fjögur dekk sem veita öllu meiri stöðugleika, fékk samt þokkalega strengi í hendurnar því það kom í ljós að eins og fæturnir þá eru hendurnar heldur í styttra lagi svo ég þurfti að beita þeim kjánalega til að ná almennilega að stýra!! Annars leið mér best þegar ég var sest undir stýri á jeppanum mínum.  Þar var ekkert jafvægistrufl í gangi og hvorki fætur né hendur of stuttar til að hafa fulla stjórn á tækinu  

Sandra hjólagella

 

Það var frábært dótaveður, passlega hlýtt og alveg þurrt.  Fullt af liði var í skóginum og stemningin var bara falleg og góð.  Allavega varð ég ekki vör við nein leiðindi.  Það var samt frekar glatað "ballið" sem var haldið við þjónustumiðstöðina.  Yfirleitt hafa svona samkomur verið í lautinni þar sem varðeldurinn er, en núna var greinilega gróðahugur í fólki því með því að troða fólkinu á pallinn bak við pöbbinn var hægt að "servera" áfenga drykki.  Þarna var takmarkað sætapláss og því sýndist mér fólk stoppa stutt við, nema þeir sem höfðu sæti að sjálfsögðu.  Held að það hefði náðst mun betri stemning ef ballið hefði verið í lautinni góðu þar sem pláss er nóg og fólk getur komið með sín drykkjarföng og komið sér svo vel fyrir í grasinu með teppi.  Þar er líka pláss fyrir krakkana að leika sér.   Ég dúllaði mér bara heim í kofa aftur og tók hundana með sem höfðu ekkert gaman af þessu heldur.

Helgin var samt alveg frábær enda ekki annað hægt þegar maður er í góðra vina og fjölskyldu hópi, með nóg af mat og drykk og fullt af tíma til að gera allt sem hugann girnist, ja fyrir utan að ég fann ekki tíma fyrir kennslubækurnar svo það á eftir að koma niður á mér þessa vikuna.  En það var vel þess virði að taka langa fríhelgi.

Þar til síðar